طريقة تركيب الجبسون بورد
الجبسون بورد بقى من البنود الأساسية في أي مشروع تشطيب داخلي، سواء سكني أو تجاري أو إداري، وعلشان تنفذ البند ده صح لازم تفهم خطواته ومكوناته كويس.
أولاً: طريقة القياس
البند بيُحسب بـ المتر المسطح (م²)، سواء للأسقف أو الحوائط.
سعر المتر بيختلف حسب التصميم، نوع اللوح، وعدد طبقات المعجون والتقفيل.
ثانياً: مكونات البند بالتفصيل
1. الهيكل المعدني (Metal Framing):
بيتكون من قطاعات معدنية مجلفنة (زاوية – أوميجا – سي – يو).
التركيب بيبدأ بتثبيت الزوايا على الحوائط، ثم توزيع القطاعات على المسافات المحددة (عادة كل 60 سم).
2. تثبيت ألواح الجبسون بورد:
استخدام ألواح جبس بسمك 12.5 مم (أو حسب المواصفات).
في أماكن الحمامات أو المطابخ يُفضل استخدام الألواح المقاومة للرطوبة.
التثبيت بيتم بالبراغي الخاصة، وبدقة لتفادي أي تعشيق غير متساوي.
3. المعجون والتقفيل (Finishing):
يتم معالجة الفواصل بين الألواح بشريط فايبر جلاس ومعجون خاص.
بعد جفاف الطبقة الأولى، بيتم صنفرتها، ثم وضع طبقة ثانية للتنعيم الكامل.
بند المعجون قد يُحسب مستقل في بعض العقود، فانتبه عند التسعير.
4. الإضافات الديكورية (حسب التصميم):
ممكن يشمل البند كورنيش جبس، فورمات إضاءة مخفية، مستويات متعددة، فتحات سبوت لايت، فتحات تكييف مخفي، إلخ.
كل إضافة من دول بتزيد في سعر المتر.
ثالثاً: الأمور الواجب الانتباه ليها قبل التعاقد
نوع القطاعات المعدنية: لازم تكون مجلفنة ومطابقة للمواصفات، علشان متصدش أو تترهل.
نوع الألواح: ماتقبلش بأقل من درجة أولى، واطلب شهادة أو بيانات من المورد.
فاصل تمدد: في المساحات الكبيرة لازم يتعمل فواصل تمدد لتجنب التشققات.
الإشراف على الطبقات: لازم تتأكد إن كل طبقة بتتعمل بعد الجفاف الكامل للي قبلها.
نصيحة :
مافيش حاجة اسمها "شغل جبس بورد رخيص وشكله حلو". لو البند اتنفذ غلط، هتواجه مشاكل بعد 6 شهور: شروخ، ترحيل في الزوايا، أو سقوط جزئي.
